Image Courtesy :jagbani(punjabkesar)

ਲੁਧਿਆਣਾ : ਕੋਰੋਨਾ ਨੂੰ ਮਾਤ ਦੇ ਕੇ 17 ਦਿਨਾਂ ਬਾਅਦ 54 ਸਾਲਾ ਡੀ. ਸੀ. ਪੀ. ਲਾਅ ਐਂਡ ਆਰਡਰ ਅਸ਼ਵਨੀ ਕਪੂਰ ਸੋਮਵਾਰ ਨੂੰ ਡਿਊਟੀ ‘ਤੇ ਵਾਪਸ ਪਰਤ ਆਏ ਹਨ। ਕੋਰੋਨਾ ਜੋਧਾ ਦੇ ਜੁਆਇਨ ਕਰਨ ‘ਤੇ ਫੋਰਸ ਦਾ ਮਨੋਬਲ ਵਧਿਆ ਹੈ, ਨਾਲ ਹੀ ਪੁਲਸ ਕਮਿਸ਼ਨਰ ਦਫਤਰ ‘ਚ ਇਕ ਵਾਰ ਫਿਰ ਉਨ੍ਹਾਂ ਦੇ ਆਫਿਸ ਨੇੜੇ ਚਹਿਲ-ਪਹਿਲ ਦਿਖੀ। ਡੀ. ਸੀ. ਪੀ. ਅਸ਼ਵਨੀ ਕਪੂਰ ਨੇ ਦੱਸਿਆ ਕਿ ਇਮਿਊਨਿਟੀ ਸਿਸਟਮ ਨੂੰ ਮਜ਼ਬੂਤ ਕਰ ਕੇ ਕੋਰੋਨਾ ਨੂੰ ਹਰਾਇਆ ਜਾ ਸਕਦਾ ਹੈ। ਉਨ੍ਹਾਂ ਨੇ ਕੁਆਰੰਟਾਈਨ ਦੌਰਾਨ ਜਿੱਥੇ ਸਵੇਰੇ ਉੱਠ ਕੇ ਯੋਗ ਕੀਤਾ, ਉਥੇ ਖੂਬ ਫਲ ਖਾਧੇ ਅਤੇ ਸ਼ਾਮ ਨੂੰ ਸੈਰ ਕੀਤੀ। ਕੋਰੋਨਾ ਨੂੰ ਹਰਾਉਣ ਲਈ ਪਾਜ਼ੇਟਿਵ ਸੋਚ ਦਾ ਹੋਣਾ ਜ਼ਰੂਰੀ ਹੈ। ਉਨ੍ਹਾਂ ਨੇ ਕੋਰੋਨਾ ਨਾਲ ਲੜ ਰਹੀ ਸਾਰੀ ਫੋਰਸ ਦੇ ਜਲਦ ਠੀਕ ਹੋਣ ਦੀ ਕਾਮਨਾ ਕੀਤੀ।
ਕੌਂਸਲਰ ਨੂੰ ਹੋਇਆ ਕੋਰੋਨਾ, ਸਫਾਈ ਮੁਲਾਜ਼ਮ ਦੀ ਮੌਤ
ਲੁਧਿਆਣਾ : ਨਗਰ ਨਿਗਮ ‘ਚ ਕੋਰੋਨਾ ਦੇ ਕੇਸਾਂ ‘ਚ ਦਿਨ-ਬ-ਦਿਨ ਇਜ਼ਾਫਾ ਹੁੰਦਾ ਜਾ ਰਿਹਾ ਹੈ। ਜਿਨ੍ਹਾਂ ‘ਚ ਜੁਆਇੰਟ ਕਮਿਸ਼ਨਰ ਕੁਲਪ੍ਰੀਤ ਸਿੰਘ ਤੋਂ ਬਾਅਦ ਕੌਂਸਲਰ ਮਨਪ੍ਰੀਤ ਗਰੇਵਾਲ ਦੀ ਰਿਪੋਰਟ ਵੀ ਪਾਜ਼ੇਟਿਵ ਆ ਗਈ ਹੈ। ਇਹ ਕਿਸੇ ਕੌਂਸਲਰ ਨੂੰ ਕੋਰੋਨਾ ਹੋਣ ਦਾ ਪਹਿਲਾ ਕੇਸ ਹੈ। ਇਸ ਦੀ ਜਾਣਕਾਰੀ ਖੁਦ ਕੌਂਸਲਰ ਨੇ ਫੇਸਬੁਕ ਪੇਜ਼ ‘ਤੇ ਲਾਈਵ ਹੋ ਕੇ ਦਿੱਤੀ ਹੈ, ਜਿਸ ‘ਚ ਉਨ੍ਹਾਂ ਨੇ ਆਪਣੇ ਸੰਪਰਕ ‘ਚ ਆਉਣ ਵਾਲੇ ਵਿਅਕਤੀਆਂ ਨੂੰ ਟੈਸਟ ਕਰਵਾਉਣ ਦੀ ਸਲਾਹ ਦਿੱਤੀ ਹੈ। ਉਧਰ, ਵਾਰਡ ਨੰ. 40 ਵਿਚ ਕੰਮ ਕਰਨ ਵਾਲੇ ਇਕ ਸਫਾਈ ਮੁਲਾਜ਼ਮ ਨੀਟੂ ਦੀ ਮੌਤ ਹੋ ਗਈ ਹੈ। ਹਾਲਾਂਕਿ ਨਗਰ ਨਿਗਮ ਅਧਿਕਾਰੀਆਂ ਵੱਲੋਂ ਉਸ ਮੁਲਾਜ਼ਮ ਦੇ ਪਹਿਲਾਂ ਬੀਮਾਰੀ ਕਾਰਨ ਛੁੱਟੀ ‘ਤੇ ਹੋਣ ਦਾ ਹਵਾਲਾ ਦਿੱਤਾ ਗਿਆ ਹੈ, ਜਦੋਂਕਿ ਸਿਹਤ ਮਹਿਕਮੇ ਦੇ ਅਫਸਰਾਂ ਦਾ ਕਹਿਣਾ ਹੈ ਕਿ ਡਾਬਾ ਕਾਲੋਨੀ ਦੇ ਰਹਿਣ ਵਾਲੇ ਨੀਟੂ ਨੂੰ 11 ਜੁਲਾਈ ਨੂੰ ਸਿਵਲ ਹਸਪਤਾਲ ‘ਚ ਲਿਆਂਦਾ ਗਿਆ ਸੀ ਪਰ ਹਸਪਤਾਲ ਪੁੱਜਣ ਤੋਂ ਪਹਿਲਾਂ ਹੀ ਉਸ ਦੀ ਮੌਤ ਹੋ ਚੁੱਕੀ ਸੀ। ਇਸ ਲਈ ਉਸ ਦੀ ਲਾਸ਼ ਮੌਰਚਰੀ ‘ਚ ਰਖਵਾ ਕੇ ਉਸ ਦਾ ਸੈਂਪਲ ਲੈ ਕੇ ਕੋਰੋਨਾ ਟੈਸਟ ਲਈ ਭੇਜ ਦਿੱਤਾ ਸੀ। ਦੋ ਦਿਨਾਂ ਬਾਅਦ ਉਸ ਦੀ ਰਿਪੋਰਟ ਕੋਰੋਨਾ ਪਾਜ਼ੇਟਿਵ ਆਈ ਹੈ। ਇਸ ਤੋਂ ਪਹਿਲਾਂ ਛਾਉਣੀ ਮੁਹੱਲਾ ‘ਚ ਰਹਿਣ ਵਾਲੇ ਇਕ ਸਫਾਈ ਮੁਲਾਜ਼ਮ ਅਤੇ ਜ਼ੋਨ-ਸੀ ਦੀ ਬੀ. ਐਂਡ ਆਰ. ਸ਼ਾਖਾ ਦੇ ਇਕ ਮੁਲਾਜ਼ਮ ਦੀ ਰਿਪੋਰਟ ਪਾਜ਼ੇਟਿਵ ਆ ਚੁੱਕੀ ਹੈ, ਜਿਨ੍ਹਾਂ ਦੇ ਨਾਲ ਕੰਮ ਕਰਨ ਵਾਲੇ ਮੁਲਾਜ਼ਮਾਂ ਨੂੰ ਕੁਆਰੰਟਾਈਨ ਕਰਨ ਦੀ ਕਾਰਵਾਈ ਕੀਤੀ ਜਾ ਰਹੀ ਹੈ।
ਮਹਾਨਗਰ ‘ਚ ਕੋਰੋਨਾ ਬਲਾਸਟ
ਲੁਧਿਆਣਾ : ਕੋਰੋਨਾ ਵਾਇਰਸ ਦਿਨ-ਬ-ਦਿਨ ਪ੍ਰਚੰਡ ਰੂਪ ਧਾਰਦਾ ਜਾ ਰਿਹਾ ਹੈ। ਸੋਮਵਾਰ ਨੂੰ ਕੋਰੋਨਾ ਬਲਾਸਟ ‘ਚ 126 ਵਿਅਕਤੀ ਇਸ ਵਾਇਰਸ ਦੀ ਲਪੇਟ ‘ਚ ਆ ਗਏ, ਜਿਨ੍ਹਾਂ ‘ਚ 116 ਵਿਅਕਤੀ ਲੁਧਿਆਣਾ ਜ਼ਿਲੇ ਦੇ, ਜਦੋਂਕਿ 10 ਦੂਜੇ ਜ਼ਿਲਿਆਂ ਨਾਲ ਸਬੰਧਤ ਹਨ। ਇੰਨੀ ਵੱਡੀ ਗਿਣਤੀ ‘ਚ ਕੇਸ ਪਹਿਲੀ ਵਾਰ ਸਾਹਮਣੇ ਆਏ ਹਨ। ਅਚਾਨਕ ਇੰਨੇ ਮਰੀਜ਼ ਸਾਹਮਣੇ ਆਉਣ ਨਾਲ ਸਿਹਤ ਮਹਿਕਮੇ ‘ਚ ਵੀ ਕਾਫੀ ਹਫੜਾ-ਦਫੜੀ ਦੇ ਹਾਲਾਤ ਬਣੇ ਹੋਏ ਹਨ। ਦੇਰ ਸ਼ਾਮ ਤੱਕ ਸਿਰਫ 80 ਮਰੀਜ਼ਾਂ ਦਾ ਹੀ ਬਿਓਰਾ ਤਿਆਰ ਕੀਤਾ ਜਾ ਸਕਿਆ।
1 ਨਵਾਂ ਕੰਟੇਨਮੈਂਟ ਅਤੇ 5 ਮਾਈਕ੍ਰੋ ਕੰਟੇਨਮੈਂਟ ਜ਼ੋਨ ਬਣੇ
ਸਿਵਲ ਸਰਜਨ ਡਾ. ਰਾਜੇਸ਼ ਬੱਗਾ ਨੇ ਦੱਸਿਆ ਕਿ ਕੋਰੋਨਾ ਵਾਇਰਸ ਦੇ ਮਰੀਜ਼ਾਂ ਦੀ ਆਮਦ ਨੂੰ ਦੇਖਦੇ ਹੋਏ ਸਲੇਮ ਟਾਬਰੀ ‘ਚ ਸਥਿਤ ਅਸ਼ੋਕ ਨਗਰ ਨੂੰ ਕੰਟੇਨਮੈਂਟ ਜ਼ੋਨ ਐਲਾਨ ਦਿੱਤਾ ਗਿਆ ਹੈ, ਉਥੇ ਕੋਰੋਨਾ ਵਾਇਰਸ ਦੇ 25 ਕੇਸ ਸਾਹਮਣੇ ਆਏ ਹਨ। ਇਸ ਤੋਂ ਇਲਾਵਾ ਫੀਲਡਗੰਜ ਦੀ ਗਲੀ ਨੰ. 5 ਵਿਚ 9 ਕੇਸ ਆਉਣ ‘ਤੇ ਵਿਜੇ ਨਗਰ ਦੀ ਗਲੀ ਨੰ. 3 ਵਿਚ 8 ਕੇਸ, ਜੀ. ਕੇ. ਅਸਟੇਟ ਦੇ ਬੀ ਅਤੇ ਸੀ ਬਲਾਕ ਵਿਚ 8 ਨਵੇਂ ਕੇਸ, ਕਿਦਵਈ ਨਗਰ ਵਿਚ ਹਾਊਸ ਨੰਬਰ 37 ਤੋਂ 76 ਤੱਕ 6 ਮਰੀਜ਼ ਅਤੇ ਨਵੀਂ ਆਬਾਦੀ ਖੰਨਾ ਵਿਚ 5 ਨਵੇਂ ਕੇਸ ਆਉਣ ‘ਤੇ ਲੱਕੀ ਚੇਅਰਡ੍ਰੈਸਰ, ਆਰ. ਐੱਸ. ਮਾਡਲ ਸਕੂਲ ਤੱਕ ਇਲਾਕਾ ਸੀਲ ਕਰਨ ਦੇ ਨਿਰਦੇਸ਼ ਜਾਰੀ ਕਰ ਕੇ ਉਪਰੋਕਤ ਇਲਾਕਿਆਂ ਨੂੰ ਮਾਈਕ੍ਰੋ ਕੰਟੇਨਮੈਂਟ ਜ਼ੋਨ ਐਲਾਨਿਆ ਗਿਆ ਹੈ। ਜਿਨ੍ਹਾਂ ਇਲਾਕਿਆਂ ‘ਚ ਕੋਰੋਨਾ ਵਾਇਰਸ ਦੇ ਸਮੂਹਕ ਕੇਸ ਸਾਹਮਣੇ ਆਏ, ਉਨ੍ਹਾਂ ਵਿਚ ਗੁਰੂ ਗੋਬਿੰਦ ਸਿੰਘ ਨਗਰ ਵਿਚ ਨਾਲ ਕਿਦਵਈ ਨਗਰ ਵਿਚ ਰਾਜੀਵ ਕਾਲੋਨੀ ਵਿਚ 4, ਸੀ. ਐੱਮ. ਸੀ. ਵਿਚ 5, ਦਸਮੇਸ਼ ਨਗਰ 3, ਡਾਬਾ ਲੋਹਾਰਾ ਰੋਡ ‘ਤੇ 4, ਬ੍ਰੋਸਟਲ ਜੇਲ ਤੋਂ 2, ਮੁਰਾਦਪੁਰਾ ਤੋਂ ਦੋ ਜਮਾਲਪੁਰ ਲੇਲੀ, ਮੋਤੀ ਨਗਰ ਤੋਂ 2, ਈਸ਼ਵਰ ਨਗਰ ਤੇ ਪਿੰਡ ਮੇਲ ਤੋਂ 5 ਤੋਂ ਇਲਾਵਾ 2 ਦਰਜਨ ਤੋਂ ਜ਼ਿਆਦਾ ਇਲਾਕਿਆਂ ‘ਚ ਕੋਰੋਨਾ ਵਾਇਰਸ ਦੇ ਇੱਦਾ-ਦੁੱਕਾ ਕੇਸ ਸਾਹਮਣੇ ਆਏ ਹਨ।
ਡੀ. ਐੱਸ. ਪੀ. ਬਾਘਾ ਪੁਰਾਣਾ ਸਮੇਤ 11 ਪੁਲਸ ਮੁਲਾਜ਼ਮ ਕੋਰੋਨਾ ਵਾਇਰਸ ਦੀ ਲਪੇਟ ‘ਚ
ਜ਼ਿਲੇ ਵਿਚ ਰਹਿਣ ਵਾਲੇ ਅਤੇ ਬਾਘਾ ਪੁਰਾਣਾ ‘ਚ ਨਿਯੁਕਤ ਡੀ. ਐੱਸ. ਪੀ. ਤੋਂ ਇਲਾਵਾ 11 ਪੁਲਸ ਮੁਲਾਜ਼ਮ ਵੀ ਕੋਰੋਨਾ ਪਾਜ਼ੇਟਿਵ ਪਾਏ ਗਏ, ਜਿਸ ਵਿਚ ਮੁੱਲਾਂਪੁਰ ਦਾਖਾ ਥਾਣੇ ਤੋਂ ਦੋ-ਦੋ ਹੈੱਡ ਕਾਂਸਟੇਬਲ ਅਤੇ ਦੋ ਕਾਂਸਟੇਬਲ ਪਾਜ਼ੇਟਿਵ ਆਏ ਹਨ, ਜਦੋਂਕਿ ਸ਼ਹਿਰ ਦੇ ਮੋਤੀ ਨਗਰ ਥਾਣਾ ਤੋਂ 22 ਸਾਲਾ ਕਾਂਸਟੇਬਲ, ਸੀ. ਆਈ. ਏ.-1 ਤੋਂ 50 ਸਾਲਾ ਏ. ਐੱਸ. ਆਈ., ਧਰਮਪੁਰੀ ਚੌਕੀ ਤੋਂ 46 ਸਾਲਾ ਏ. ਐੱਸ. ਆਈ., ਮੋਤੀ ਨਗਰ ਥਾਣਾ ਤੋਂ 49 ਸਾਲਾ ਏ. ਐੱਸ. ਆਈ., ਸੀ. ਆਈ. ਏ.-1 ਤੋਂ 50 ਸਾਲਾ ਏ. ਐੱਸ. ਆਈ., ਸੀ. ਆਈ. ਏ.-1 ਤੋਂ 32 ਸਾਲਾ ਹੈੱਡ ਕਾਂਸਟੇਬਲ, ਡਵੀਜ਼ਨ ਨੰ.7 ਥਾਣੇ ਤੋਂ 42 ਸਾਲਾ ਹੈੱਡ ਕਾਂਸਟੇਬਲ ਵੀ ਕੋਰੋਨਾ ਪਾਜ਼ੇਟਿਵ ਪਾਏ ਗਏ ਹਨ। ਇਸ ਤੋਂ ਇਲਾਵਾ ਸ਼ਿਮਲਾਪੁਰੀ ਥਾਣੇ ਤੋਂ 54 ਸਾਲਾ ਏ. ਐੱਸ. ਆਈ. ਵੀ ਕੋਰੋਨਾ ਪਾਜ਼ੇਟਿਵ ਆਏ ਹਨ।
859 ਰਿਪੋਰਟਾਂ ਦਾ ਇੰਤਜ਼ਾਰ
ਜ਼ਿਲ੍ਹਾ ਮਲੇਰੀਆ ਅਫਸਰ ਡਾ. ਰਮੇਸ਼ ਭਗਤ ਨੇ ਦੱਸਿਆ ਕਿ ਅਜੇ 859 ਰਿਪੋਰਟਾਂ ਦਾ ਇੰਤਜ਼ਾਰ ਹੈ, ਜੋ ਪੈਂਡਿੰਗ ਹਨ। ਇਸ ਤੋਂ ਇਲਾਵਾ ਅੱਜ 616 ਵਿਅਕਤੀਆਂ ਦੇ ਸੈਂਪਲ ਜਾਂਚ ਲਈ ਭੇਜੇ ਗਏ ਹਨ।
News Credit :jagbani(punjabkesar)